2020-01-03 01:21:36

عزيزتي المرأة ...

عزيزتي المرأة ...
رجاءً فكري منيح وين وكيف ومتى تموتي وبأي ظروف. إعملي حساباتك صح ها !!!
مش تروحي تموتي بحادث سير وإنت مرَوحة مع زميلك من الشغل متأخر !! بقولوا شو كاينة تعمل معو ها ..ديري بالك
أو مثلًا تروحي تموتيلنا دهس وانت مروحة بعد الساعة 8 بالليل مشي ..اكيد رح يقولوا شو كاينة تعمل بالشارع بهيك وقت متأخر !!
وإوعك يا حبيبتي تنتحري، إوعك، أكيد ساعتها بتكوني عاملتيلك شي عملة وخايفة ...
وحسّك عينك تموتي بملهى ليلي ! أنو ملهى ليلي ؟ فش عنا منه هذا الخراف احنا. انشالله تروحي مع اخوك هناك، حاولي تجنبي الموت يختي....
وإوعك حدا يخطفك ويقتلك وإنت لابسة تنورة ميني أو بلوزة مفتوحة، بهاي الظروف مفضّل تكوني مستّرة وإنت عم تموتي ...
ويا ريت ما تموتيش ولا بأي نوع عملية كانت، مش حلو تحطي البشر بإحراج السؤال هل تعتبري شهيدة أم لا... مش حلو بالمرة ...
ويا ويلك ويا سواد ليلك اذا زوجك قتلك .... أكيد خنتيه ... فش مجال للحكي !! والقتل على شرف العائلة مسموح خيتا...
مفضّل كمان متمرضيش مرض قاسي... بكون الله بعاقبك على عمايلك السودة !!
على حد علمك يعني، شعبنا حسّاس كتير، ولازم نراعي هالحساسية ..
إوعك تفكري إنه عندك حرية الاختيار هون، لا يحبيبتي يا روح امك لا، إنت مش حرّة بالذّات بموتك... فرجاءً حاولي متموتيش لحالك، خلّي الشعب كله هو اللي يقتلك، ويقتل أهلك وراكِ، شو ورانا !! هيانا قاعدين يا حبيبتي...
................................................................
واعجبني ما نشرته السيدة نيفين ..فقررت اقتباسه ( بالعربي اسرقوا ) مع شوية تعديلات بعد سماحك نيفين .. المجد لراس العبد (كرمبو) المحشو بالكريما
في ظل كل هذه الرؤووووس المحشوه بالكراهية والغباء والتفاهه والسخافه والتحريض والانحطاط يا حثالة البشر يا من تدعون ان الاسلام دينكم وهو بريىء منكم الى يوم الدين
 


 

تعليقات

الاسم:
البلد :
التعليق :
جميع الحقوق محفوظة لموقع مجدنا | 2011 - 2015
(الآراء المنشورة في الموقع تعبر عن رأي كاتبيها فقط )